ఇందిరా గాంధీ బంగారం అప్పీల్‌పై వైరల్ వార్త.. అసలు నిజం ఇదే!

ప్రధాని నరేంద్ర మోదీ ఇటీవల చేసిన 'బంగారం కొనుగోళ్లు ఏడాది పాటు ఆపండి' అనే విజ్ఞప్తి రాజకీయంగా దుమారం రేపుతున్న వేళ, సోషల్ మీడియాలో ఓ పాత వార్త వైరల్ అవుతోంది. 1967లో అప్పటి ప్రధాని ఇందిరా గాంధీ కూడా దేశ ప్రజలకు ఇలాంటి పిలుపు ఇచ్చారంటూ ఓ వార్తాపత్రిక క్లిప్పింగ్ చక్కర్లు కొడుతోంది. అయితే, ఈ వార్త పూర్తిగా నకిలీదని ప్రముఖ ఆంగ్ల దినపత్రిక 'ది హిందూ' స్పష్టం చేసింది.

ఏమిటీ వివాదం?
"1967 జూన్ 6 నాటి 'ది హిందూ' పత్రిక ముఖచిత్రం" అంటూ ఓ డిజిటల్ ఫొటోను సోషల్ మీడియాలో విస్తృతంగా ప్రచారం చేస్తున్నారు. 'బంగారం కొనొద్దు, జాతీయ క్రమశిక్షణ పాటించండి' అని ఇందిర ప్రజలకు విజ్ఞప్తి చేసినట్లు అందులో ఉంది. ఈ ప్రచారంపై 'ది హిందూ' యాజమాన్యం స్పందిస్తూ.. "ప్రస్తుతం సోషల్ మీడియాలో సర్క్యులేట్ అవుతున్నది మా పత్రికకు సంబంధించిన ప్రామాణికమైన పేజీ కాదు. దాన్ని డిజిటల్‌గా మార్పులు చేశారు. ఇలాంటివి షేర్ చేసే ముందు వాస్తవాలను ధృవీకరించుకోవాలి" అని అధికారికంగా ప్రకటించింది.

రాజకీయ రంగు పులుముకున్న వివాదం
ప్రధాని మోదీ వ్యాఖ్యలను సమర్థించేందుకు బీజేపీ నేతలు ఈ నకిలీ వార్తను ప్రస్తావిస్తున్నారు. కర్ణాటక ప్రతిపక్ష నేత ఆర్. అశోక మాట్లాడుతూ.. "1967లో ఇందిరా గాంధీ బంగారం కొనొద్దని చెబితే 'జాతీయ క్రమశిక్షణ' అని, 2013లో చిదంబరం చెబితే 'ఆర్థిక బాధ్యత' అని కాంగ్రెస్ నేతలు అన్నారు. కానీ, ఇప్పుడు మోదీ చెబితే మాత్రం విమర్శిస్తున్నారు. ఇది కాంగ్రెస్ ద్వంద్వ వైఖరికి నిదర్శనం" అని ఎక్స్‌లో పోస్ట్ చేశారు.

మరోవైపు కాంగ్రెస్ నేతలు మోదీ ప్రభుత్వంపై విమర్శలు గుప్పిస్తున్నారు. ప్రజలను త్యాగాలు చేయాలని కోరడం ప్రభుత్వ వైఫల్యానికి నిదర్శనమని కాంగ్రెస్ అగ్రనేత రాహుల్ గాంధీ అన్నారు. "బంగారం కొనొద్దు, విదేశాలకు వెళ్లొద్దు, పెట్రోల్ వాడకం తగ్గించుకోండి అనడం ప్రభుత్వ వైఫల్యానికి సాక్ష్యం కానీ గొప్ప ప్రసంగాలు కావు" అని ఆయన విమర్శించారు.

వాస్తవానికి 1960వ దశకంలో భారత్ తీవ్రమైన విదేశీ మారక ద్రవ్య నిల్వల కొరతను ఎదుర్కొంది. ఆ సమయంలో కఠినమైన గోల్డ్ కంట్రోల్ నిబంధనలు కూడా అమల్లో ఉన్నాయి. అయితే, ఇందిరా గాంధీ బంగారం కొనొద్దని బహిరంగంగా పిలుపునిచ్చినట్లు వైరల్ అవుతున్న క్లిప్పింగ్‌కు ఎలాంటి ఆధారాలు లేవని 'ది హిందూ' స్పష్టం చేయడంతో, ఈ నకిలీ వార్త ఆధారంగా అధికార, ప్రతిపక్షాల మధ్య మాటల యుద్ధం కొనసాగుతోంది.